வானூறி மழைபொழியும்
வயலூறிக் கதிர்வளையும்
தேனூறிப் பூவசையும்
தினம்பாடி வண்டாடும்
காலூறி அழகுநதி
கவிபாடிக் கரையேறும்
பாலூறி நிலம்கூட
பசியாறும் தஞ்சாவூர்
தேரோடித் தெருமிளிரும்
திருவோடி ஊரொளிரும்
மாரோடி உயர்பக்தி
மதமோடி உறவாடும்
வேரோடிக் கலைவளரும்
விரலோடித் தாளமிடும்
பாரோடிப் பொருள்வெல்லும்
பொன்னோடும் தஞ்சாவூர்
சேறோடி நெல்விளைத்து
ஊரோடி உணவளித்து
யாரோடி வந்தாலும்
கண்ணோடிக் கறிசமைத்து
நீரோடி வளர்வாழை
நிலமோடி இலைவிரிக்க
ஓடோடி விருந்தோம்பி
விண்ணோடும் தஞ்சாவூர்
வாய்மணக்கும் வெத்திலைக்கும்
வயல்மணக்கும் காவிரிக்கும்
காய்மணக்கும் தென்னைக்கும்
கைமணக்கும் பட்டுக்கும்
சேய்மணக்கும் சேலைக்கும்
சிகைமணக்கும் பெண்ணுக்கும்
தாய்மணக்கும் பண்புக்கும்
தரம்மணக்கும் தஞ்சாவூர்
தலையாட்டும் பொம்மைக்கும்
அலைகூட்டும் பாட்டுக்கும்
கலையூட்டும் கோவிலுக்கும்
சிலைகாட்டும் சோழனுக்கும்
மழைகூட்டும் மண்ணுக்கும்
பிழையோட்டும் தமிழுக்கும்
நிலைநாட்டும் புகழோடு
எழில்காட்டும் தஞ்சாவூர்
5 comments:
நஞ்சையும் புஞ்சையும் கொஞ்சி விளையாடும் தஞ்சைத் தரணியின் பெருமைகளை அழகு தமிழ்க் கவிதையாக அருமையாக வடித்துள்ளீர். வாழ்த்துகிறேன் புகாரி.
தஞ்சாவூர் மைந்தனுக்கு தமிழைச் சொல்லியா கொடுக்கவேண்டும்?
அன்பின் மஸ்தூக்கா,
உங்கள் ஊர் பற்றியும் அதன் பண்பாடு கலாச்சார சிறப்புகள் பற்றியும் விரிவாக எழுதி அனுப்புங்கள். அடுத்த பதிவாக தஞ்சாவூர் வலைப்பூவில் இடலாம்.
அன்புடன் புகாரி
தஞ்சாவூர் கூட்டுப் பதிவுக்கு வாழ்த்துக்கள். இதையும் திரட்டிகளில் காண ஆவல்.
புகாரி, நல்ல முயற்சி - அருமையான பதிவின் தொடக்கம். வாழ்த்துகள்.
தமிழ் மணக்கும் தஞ்சை மண்ணின் பெருமையை விளக்கம் வண்ணம் துவங்கியிருக்கும் இவ்வலைப்பூவை துவக்கிய ஆசிரியர் குருமூர்த்தி ஐயாவிற்கும் அவரின் மாணவரான "அன்புடன்"-தமிழ் இணையக் குழும ஆசிரியர் தஞ்சை மண்ணின் மற்றுமொரு கவிஞர் புகாரி அவர்களுக்கும் என் வாழ்த்துக்கள்
Post a Comment